បញ្ហាកង្វះខាតគ្រូបឋមសិក្សានៅក្នុងខេត្តកំពង់ចាម
ដោយ ហ្សាការីយ៉ា
2008-09-10
ប្រធានមន្ទីរអប់រំខេត្តកំពង់ចាមបានឲ្យដឹងថា សម្រាប់ខេត្តកំពង់ចាមគឺមានការខ្វះខាតគ្រូបឋមសិក្សាប្រមាណ២០០០នាក់ទៀត។
គរុសិស្សដែលបានរៀនវគ្គបណ្តុះបណ្តាលគរុកោសល្យរយៈពេលពីរឆ្នាំចំនួន១៦០នាក់ត្រូវបានបញ្ចប់ និងបានចាប់ប៉ុស្តិ៍រើសទីតាំងបង្រៀននៅថា្នក់បឋមសិក្សារៀងៗខ្លួន។ ក្នុងចំណោមអ្នកទាំងនោះ អ្នកខ្លះបានចាប់ប៉ុស្តិ៍ទៅបង្រៀននៅស្រុកកំណើតរបស់ខ្លួនតែចំពោះមួយចំនួនទៀតបានទៅស្រុកផ្សេង។
គរុសិស្សមួយចំនួនដែលបានបំពេញការងារជាគ្រូបង្រៀននៅស្រុកដទៃបានថ្លែងថា ពួកគេមានការលំបាកក្នុងការស្នាក់នៅនិងបញ្ហាផ្សេងៗទៀត ពិសេសគឺស្រ្តី។ ទោះជាក្នុងឆ្នាំ២០០៨នេះ មានគរុសិស្សចំនួន១៦០នាក់ទៅបំពេញការងារនៅតាមសាលាបឋមសិក្សាមួយចំនួនក្នុងខេត្តកំពង់ចាម ដែលខ្វះខាតគ្រូនោះក៏ដោយ។ ប៉ុន្តែបើតាមការអះអាងរបស់ប្រធានមន្ទីរអប់រំខេត្តថា ចំនួននេះមិនគ្រប់គ្រាន់សម្រាប់តម្រូវការដែលខ្វះខាតគ្រូនោះឡើយ។
ប្រធានមន្ទីរអប់រំខេត្តកំពង់ចាម លោក ស្វាយ ផល្លា បានមានប្រសាសន៍ថា សម្រាប់ខេត្តកំពង់ចាមគឺតម្រូវការគ្រូបឋមសិក្សាជាង២០០០នាក់ ទើបគ្រប់ចំនួនក្នុងការបង្រៀននៅតាមសាលាបឋមមួយចំនួនទូទាំងខេត្ត។
លោកបានបញ្ជាក់ថា ចំពោះធនធានមនុស្សមិនខ្វះទេព្រោះពីមួយឆ្នាំទៅមួយឆ្នាំមានយុវសិស្សជាច្រើនដែលបានបញ្ចប់ការសិក្សាកម្រិតទុតិយភូមិ ប៉ុន្តែក្រសួងអប់រំក៏ដូចជារដ្ឋាភិបាលខ្វះថវិកាក្នុងការផ្គត់ផ្គង់ប្រាក់បៀវត្សរ៍។
លោក ស្វាយ ផល្លា បានឲ្យដឹងថា ៖ «ចំពោះមួយឆ្នាំ ក្រសួងអប់រំនិងកីឡាផ្ដល់ជូន១៦០នាក់ហ្នឹង គឺថាវាអត់ស្មើពេលនឹងគ្រូយើងចូលនិវត្តន៍ក្នុងមួយឆ្នាំៗ ប្រមាណ២០០នាក់ផង។ ដូច្នេះបើយើងធ្វើលេខដកទៅយើងឃើញថា រើស១៦០នាក់ ហើយយើងចូលនិវត្តន៍២០០នាក់ គឺថាវាអត់ស្មើគ្នាទេ យើងនៅតែខ្វះ។ ក្រសួងអប់រំ យុវជន និងកីឡា បានស្នើសុំពីរាជរដ្ឋាភិបាលបានផ្ដល់ចំនួនប្រមាណជា៥ពាន់នាក់ក្នុងមួយឆ្នាំ ប៉ុន្តែដឹងស្រាប់ហើយ៥ពាន់នាក់ យើងបែងចែកទៅឲ្យគ្រូមធ្យមសិក្សា បឋមភូមិ បែងចែកឲ្យគ្រូមតេ្តយ្យ បែងចែកទៅឲ្យគ្រូបឋមសិក្សា បែងចែកទៅឲ្យគ្រូមធ្យមសិក្សា។ ដូច្នេះនៅក្នុងចំនួន៥ពាន់នាក់ហ្នឹង យើងបែងចែកទៅដល់គ្រូទាំង២ ទាំង៣ កម្រិតហ្នឹងរហូត ហើយយើងបែកចែកទៅតាមខេត្តក្រុងទៀតទាំង២៤ខេត្តក្រុង»។
លោក ស្វាយ ផល្លា បានបន្តថាក្នុងមួយឆ្នាំគរុសិស្សបានបញ្ចប់វគ្គគរុកោសល្យជាង១០០នាក់ ប៉ុន្តែក្នុងនោះមានភាគតិចដែលជាគរុសិស្សជាជនជាតិខ្មែរអ៊ិស្លាម ប្រសិនបើមានគរុសិស្សជនជាតិខ្មែរអ៊ិស្លាមច្រើននោះ គឺងាយស្រួលក្នុងការទៅបង្រៀននៅសហគមន៍ដាច់ស្រយាលដែលក្មេងតូចៗមិនអាចស្តាប់ភាសាជាតិបាន។
លោក ស្វាយ ផល្លា បានមានប្រសាសន៍ថា ៖ «ខ្ញុំសូមអំពាវនាវថា តំបន់ដែលមានជនជាតិអ៊ិស្លាមច្រើន គឺថាសូមឲ្យបងប្អូនខិតខំផ្ដល់ជូន ឬមួយក៏ថាជំរុញកូនចៅគាត់មកចូលរៀនឲ្យបានច្រើន ដើម្បីគាត់មានចំណេះដឹងផ្នែកអក្សរសាស្រ្ដខ្មែរយើង ផ្នែកចំណេះដឹងទូទៅហ្នឹង ហើយគាត់មានលទ្ធភាពអាច បើគាត់ចង់ធ្វើជាគ្រូក្ដី គាត់ចង់ធ្វើស្អី គាត់មានលទ្ធភាព ដោយសារគាត់មានចំណេះដឹង គាត់មានសញ្ញាបត្រ គាត់អាចប្រឡងចូលគ្រូ ប្រឡងចូលទៅប្រទេសនានា ហើយគាត់អាចចូលប្រទេសយើងបាន»។
មន្រ្តីសម្របសម្រួលបចេ្ចកទេសរបស់អង្គការអប់រំពិភពលោក ដែលសហការនឹង Eskape លោក អ៊ុល រុន បានមានប្រសាសន៍ថា ដោយឃើញកុមារនៅតាមតំបន់ដាច់ស្រយាលមានការលំបាកក្នុងការសិក្សា ដោយកង្វះគ្រូផងនោះ អង្គការរបស់លោកបានជួយដល់គរុសិស្សចំនួន៣៥នាក់ មកពីស្រុកពញាក្រែក និងស្រុកត្បូងឃ្មុំ ក្នុងនោះមានគរុសិស្សខ្មែរអ៊ិស្លាមចំនួន៥នាក់ផងដែរ។ នៅពេលពួកគេបានបញ្ចប់ការសិក្សាគរុកោសល្យអង្គការរបស់លោកបានស្នើសុំមន្ទីរអប់រំខេត្តឲ្យពួកគេទៅបង្រៀនៅសហគមន៍របស់ខ្លួនវិញ។
លោក អ៊ុល រុន បានបញ្ជាក់ថា ៖ «កន្លងមកយើងមានកម្មវិធីមួយ គឺយើងជួយគាំទ្រកុមារដែលជួបការលំបាក ជាពិសេសកុមារជនជាតិ ហើយនៅក្នុងហ្នឹងយើងបានជួយឧបត្ថម្ភដល់កុមារខ្មែរអ៊ិស្លាមដែលជួបបញ្ហាលំបាកខាងភាសា។ ដើម្បីដោះស្រាយបញ្ហាភាសានៅក្នុងថ្នាក់ទី១ ពីព្រោះក្មេងដែលវាមកពីសហគមន៍ វាអត់ចេះភាសាខ្មែរទេ។ ដូច្នេះកម្មវិធីរបស់យើង យើងបានជ្រើសរើសអន្តរាគមន៍មួយដែលហៅថា អ្នកសម្របសម្រួលភាសា។ អ៊ីចឹងយើងជ្រើសរើសពីសហគមន៍ជនជាតិ ឬក៏សហគមន៍ខ្មែរអ៊ិស្លាម យើងមកបណ្ដុះបណ្ដាលរយៈពេល៣ថ្ងៃកន្លះ ហើយយើងបានឲ្យគាត់ទៅបម្រើការជាដៃគូជាមួយគ្រូរដ្ឋ ដែលគាត់អត់ចេះនិយាយភាសាខ្មែរអ៊ិស្លាម ឬក៏ភាសាជនជាតិ។ ហើយកន្លងមកនេះចំនួនអ្នកសម្របសម្រួលភាសានៅក្នុងខេត្តកំពង់ចាម យើងមានរហូតដល់ជិត៣០នាក់ សម្រាប់តែជនជាតិខ្មែរអ៊ិស្លាម»។
លោកបានបន្តថា លោកមានការបារម្ភចំពោះការកង្វះខាតគ្រូ រដ្ឋាភិបាលគួរតែយកចិត្តដាក់មកលើបញ្ហានេះ ៖ «ដើម្បីដោះស្រាយរឿងភាពមិនចេះអក្សរនៅក្នុងសហគមន៍ដាច់ស្រយាល ទី១ យើងត្រូវគិតអំពីគ្រូបង្រៀន។ យើងដឹងហើយនៅក្នុងប្រទេសកម្ពុជាយើង គឺគ្រូបង្រៀនខ្វះច្រើនណាស់ រាប់ម៉ឺននាក់ ដែលជាបញ្ហាចម្បងក្រសួងអប់រំត្រូវដោះស្រាយ។ ហើយយើងគិតថា ចាប់ពីឆ្នាំ២០០៩ ចំនួនកុមារនៅក្នុងទូទាំងប្រទេសនឹងកើនឡើងទៀត ដូច្នោះការដោះស្រាយគ្រូបង្រៀនគឺជាកត្តាចំបាច់»។
គរុសិស្សមកពីស្រុកព្រៃឈរ ឈ្មោះ សុខុម បានមានប្រសាសន៍បន្ទាប់ពីដឹងលទ្ធផលនៃការចាប់ប៉ុស្តិ៍បង្រៀនកាលពីថ្ងៃទី៣ កញ្ញា ថា ៖ «បើបានទៅស្រុកវិញខ្ញុំមានអារម្មណ៍ថាសប្បាយចិត្ត ហើយការចំណាយរបស់ខ្ញុំក៏តិចតួចដែរ។ នាងខ្ញុំសូមសំណូមពរដល់រាជរដ្ឋាភិបាលគួរតែដំឡើងប្រាក់បៀវត្សរ៍សម្រាប់គ្រូបង្រៀន»។
គរុសិស្សខ្មែរអ៊ិស្លាមឈ្មោះ ជំឡះ មកពីស្រុកក្រូចឆ្មារ បានសម្ដែងសុទិដ្ឋិនិយមថា ៖ «គោលបំណងក្នុងការដែលខ្ញុំចង់ទៅធ្វើគ្រូបង្រៀនដោយសារតែខ្ញុំឃើញថា ជនជាតិខ្មែរអ៊ិស្លាមទាំងអស់ដែលកំពុងតែសិក្សារាល់ថ្ងៃនេះជួបនឹងការលំបាក ដោយសារតែពួកគេហ្នឹងមិនសូវចេះខ្មែរ នៅថ្នាក់ទី១ និងថ្នាក់ទី២។ បញ្ហាមួយទៀតដោយសារតែគ្រូបង្រៀនខ្មែរអ៊ិស្លាមហ្នឹងពុំមានសូវមាន។ ក្នុងករណីនេះហើយដែលខ្ញុំពុះពារព្យាយាមក្នុងការរៀនដើម្បីបម្រើនូវសហគមន៍ ហើយនិងប្រទេសជាតិទាំងមូល។ ដូច្នេះខ្ញុំសូមអំពាវនាវដល់យុវសិស្សដែលជាជនជាតិខ្មែរអ៊ិស្លាមទាំងអស់សូមដាក់ពាក្យធ្វើជាគ្រូបង្រៀនដើម្បីប្រទេសជាតិរបស់យើង»។
គរុសិស្សម្នាក់ទៀតឈ្មោះ ហ្សារ៉ោះ បានសម្ដែងនូវការសោកស្តាយថា ប្រសិនបើក្រសួងក៏ដូចជាមន្ទីរអប់រំបានរៀបចំផ្តល់អាទិភាពទៅស្រុកកំណើតរបស់ខ្លួន គឺងាយស្រួលក្នុងការបង្រៀនដោយស្គាល់ពីភូមិសាស្រ្តស្រាប់ និងស្គាល់ពីសុខទុក្ខសិស្ស និងបញ្ហាស្នាក់នៅជាដើម។
គរុសិស្សឈ្មោះ ហ្សារ៉ោះ បានឲ្យដឹងថា ៖ «ពីព្រោះដូចជារូបនាងខ្ញុំផ្ទាល់ បើខ្លួនខ្ញុំជាស្រី ហើយចូលទៅក្នុងសហគមន៍ខ្លួនឯងផ្ទាល់វាងាយស្រួល ការស្នាក់នៅ និងហូបចុក»។
សូមជម្រាបថា ប្រធានមន្ទីរអប់រំខេត្តកំពង់ចាម លោក ស្វាយ ផល្លា បានឲ្យដឹងថាសាលាបឋមសិក្សាទាំងអស់ក្នុងខេត្តមានចំនួន៧៧២ និងមានជាង៨០០០ថ្នាក់។ ក្នុងខេត្តនេះដែរខ្វះគ្រូជាង២០០០នាក់ ហើយដើម្បីបង្រ្គប់នៃការខ្វះខាតនេះមន្ទីរបានរៀបចំគ្រូបង្រៀនពីរពេលចំនួន១៦០០នាក់ និងគ្រូជាប់កិច្ចសន្យា៦០០នាក់៕
| M | T | W | T | F | S | S |
|---|---|---|---|---|---|---|
| « Oct | ||||||
| 1 | 2 | 3 | 4 | 5 | 6 | |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | |||
- Most Popular Posts
- ប្រវត្តិស...: 25
- វប្បធម៌នឹ...: 15
- : 11
- ប្រពៃណី: 7
- Links: 6
- វិប្បធម៌02: 5
- វិស័យការស...: 4
- ប្រាសាទ04: 3
- Barack Obama : 2